Ish-raportuesi i Kombeve të Bashkuara, i cili ishte përfaqësuesi i parë i kësaj organizate që e kishte vizituar Venezuelën para 21 vjetësh, Alfred de Zayas, ka thënë se sanksionet e Shteteve të Bashkuara ndaj Venezuelës janë ilegale dhe mund të cilësohen si krime kundër njerëzimit sipas ligjeve ndërkombëtare.

Zayas, i cili e përfundoi mandatin në mars të vitit të kaluar, i ka kritikuar Shtetet e Bashkuara të Amerikës për shpallje të luftës tregtare kundër Venezuelës, e cila po e dëmton ekonominë dhe po i vret venezuelasët. Këto komente vijnë në kohën kur në këtë shtet po rriten tensionet për shkak se SHBA-ja dhe Britania e Madhe po e mbështesin Guaidon si president të përkohshëm.

Në anën tjetër, Rusia, Kina dhe Turqia kanë shprehur përkrahje për presidentin aktual, Nicolas Maduro. Ish-sekretari i Këshillit për Mbrojtjen e të Drejtave të Njerëzve dhe eksperti i ligjeve ndërkombëtare ka thënë se raporti i tij, të cilin e kishte publikuar në shtator të vitit të kaluar, është lënë anash nga Kombet e Bashkuara dhe nuk e ka nxitur zhvillimin e debatit publik që e meriton.

“Sanksionet vrasin”, ka thënë ai. Sipas tij, pasojat e sanksioneve i godasin më së shumti njerëzit më të varfër të shoqërisë, duke i rrezikuar ata nga vdekja për shkak të zvogëlimit të sasisë së ushqimit dhe ilaçeve, shkruan “Independent”